БИШКЕК, 30-апр. — Sputnik. Президенттин катышуусунда болгон Коргоо кеңешинин кезектеги жыйынында Жаза аткаруу системасын жакшыртуу жана чек араны чыңдоо боюнча эки маселе кең-кесири талкууланганын кеңештин катчысы Темир Жумакадыров чогулуштун жыйынтыгы боюнча айтып жатып билдирди.
Ал Жаза аткаруу системасын жакшыртуу боюнча кечиктирилгис аракеттерди көрүү айтылып, аны ишке ашырууда комплекстүү аракеттер көрүлөрүн кошумчалады.
"Жаза аткаруу системасында кечиктирилгис иштерди аткаруу маселелери каралды. Бул маселе 25 жылдан бери биринчи жолу ушундай жогорку деңгээлде талкууланып жатат. Чейрек кылым бою көмүскөдө калып калгандай сезимдер болуп келгенин бул тармактын өкүлдөрү айтты", — деди ал.
Жумкадыров ошондой эле атайын соттолгон жарандарды өзүнчө кармоо маселеси көтөрүлгөнүн айтып, абактарды коргоо жана кайтаруу маселеси да талкууланганын кошумчалады.
Андан сырткары, чыр-чатак чыгым келген аймактардын социалдык экономикалык абалын жакшыртуу боюнча тийиштүү органдарга тапшырмалар берилгенин баса белгиледи.
