БИШКЕК, 28-апр. — Sputnik. Кыргызстанда инвестиция тартуу жана экспортту өнүктүрүү боюнча бирдиктүү институт түзүлө турганын премьер-министр Сооронбай Жээнбеков Жогорку Кеңеште өкмөттүн 2015-жыл үчүн отчетун берип жатып билдирди.
Анын айтымында жаңы түзүлгөн мекеме ар бир экспортер менен иш алып барат. Өкмөт башчы кыргыз-казак чек арасындагы "Ак-Тилек" көзөмөл өткөрүү пунктундагы абал талапка жооп бербей турганын белгиледи.
"Узакка созулган кезек, инфраструктуранын начар абалы, чек ара, бажы жана салык кызматтарынын өз алдынча иштеши экспортерлорго кыйынчылык жаратууда", — деди премьер-министр.
Жээнбеков көзөмөл пункттарында тартипти жөнгө салуу үчүн ар бир пункт боюнча анык бир чаралар иштелип чыгарын белгилеп, кыргыз-казак чек арасында ветеринардык көзөмөлдү жоюу боюнча иштер улантыларын кошумчалады.
