БИШКЕК, 4-апр. — Sputnik. Санкт-Петербург шаарында Нева дарыясына чөгүп бара жаткан эки жашар Кинан Алиевди куткарып калган кыргызстандыктар — Эркин Турсунбаев менен Чыңгыз Нурмуханбетов ӨКМдин медалы менен сыйланышты. Бул тууралуу аталган мекеме билдирди.
Маалыматка ылайык, КР жарандары учурда Россияда болгондуктан, сыйлык алардын атасы Эгемберди Турсунбаевге берилди. Кырсык 5-февраль күнү болгон. Сууга чөгүп бараткан баланы алгач Эркин Турсунбаев байкап, токтоосуз жардамга ашыккан.
"Эркин баланы башынан кармап чыгарды. Бала ошондо эле эсинен танып калыптыр. Жээкке сүзүп келгенде күйөө балам Чыңгыз чуркап барды. Баланы колуна алары менен муз жарылып, үчөө тең кайра сууга кирип кетишти. Суудан чыгууга төрт жолу аракет жасашты. Алсырап баратканда бир бала чуркап келип, лыжанын таягын суна калды. Ошентип жатып араң суудан чыгышты", — дейт Эгемберди Турсунбаев.
Аман калган кичинекей Кинан ооруканага жеткирилип, ал жактан ага тиешелүү жардам көрсөтүлгөн. Анын ата-энеси уулун сактап калгандарга чексиз ыраазы экендиктерин билдиришкен.
