БИШКЕК, 4-апр. — Sputnik. Автотыгын учурунда жамгырда калып, жолдун кесилишинде туруп унаалардын кыймылын жөнгө салган жаран мыйзам боюнча жаза тартып, айып пул төлөшү мүмкүн. Бул тууралуу юрист Владимир Плужник билдирди.
Юристтин айтымында, "элдик инспектордун" аракети жолоочулардын, унаа каражаттарынын кыймылына мыйзамсыз чек коюу катары бааланышы мүмкүн.
"Мыйзамда "Жолду мыйзамсыз жабуу" беренеси боюнча 3000 сом өлчөмүндө айып пул салуу каралган. Бирок эч ким деле жазага тартылбаса керек. Ошол эле учурда Кайгуул милициясынын кызматкерлери үчүн эч кандай чара каралган эмес", — деди юрист.
Кайгуул милиция башкармалыгы бул боюнча учурда кызматтык териштирүү жүрүп жатканын белгиледи. Анын натыйжасында жол кыймылын көзөмөлгө албаган кызматкерлерге дисциплинардык чара көрүлөрү айтылды.
