БИШКЕК, 4-апр. — Sputnik. Армян аскердик күчтөрү Тоолуу Карабах менен чектешкен жердин бир катар тилкелеринде алдыга жылды деп билдирди Армениянын Коргоо министринин маалымат катчысы Арцрун Ованнисян.
"Армян аскердик күчтөрү чектешкен жердин бир катар тилкелеринде алдыга жылып, олуттуу ийгиликтерге жетти. Жаңы аймактар (позициялар) бошотулуп, жаңы чектер ачылды", — деп жазды Ованнисян Facebook социалдык тармактагы баракчасына.
Ал эми Азербайжандын Коргоо министринин маалымат кызматынын жетекчиси Вагиф Дяргахлы "армян аскерлери эч кандай алдыга жылган жок", — деп билдирди.
Азербайжан менен Армения Тоолуу Карабахтын айынан 1988-жылдын февралынан бери чатакташып келет. Анда армян эли басымдуулук кылган Карабах автономиялуу облусу Азербайжандын курамынан чыкканын билдирген. 1991-жылдын сентябрь айында борбор калаа болгон Степанакертте Тоолуу Карабах Республикасынын түзүлгөндүгү жарыяланган. Азербайжан андагы аскерий чыр-чатактан кийин Карабахка көзөмөл кыла албай калган.
