БИШКЕК, 31-мар. — Sputnik. Айыл чарба министрлиги "Пахта" долбоорунун үстүндө иштеп жатканын премьер-министр Темир Сариев Жогорку Кеңештеги өкмөттүк саатта билдирди.
Депутат Тынчтык Шайназаров буга чейин Ошто "Текстильщик" жана Пахта иштетүүчү комбинат иштеп келгенин айтып, учурда бул жерлерге турак жай менен базарлар орун алганын белгиледи. Ал эми дыйкандар өлкөнүн ак алтынга муктаждыгы бар экенине карабастан чет өлкөгө алып чыгууга мажбур болуп жатканы айтылды.
"Айыл чарба министрлиги "Пахта" программасынын үстүндө иштеп жатат. Анда бардык этаптар — үрөндөн баштап кайра иштетилишине чейинки процесстер камтылат. Алгачкы үзүрү байкала баштады: жакында Кара-Балтада текстиль фабрикасы ачылганы турат. Ош боюнча ишканаларды калыбына келтирүү маселесин карап чыгуу керек", — деди Сариев.
Премьер-министр бул боюнча Орус-кыргыз өнүктүрүү фондусуна кайрылуу ыктымалдыгын белгилеп өттү.
