БИШКЕК, 27-мар. — Sputnik. Дөңгөлөктөрү толук ачылбай Астана аэропортуна конгон Bek Air авиакомпаниясына таандык учактын экипаждары мамлекеттик сыйлыкка көрсөтүлө турганын "Новости — Казакстан" маалымат агенттиги Инвестиция жана өнүгүү министри Асет Исекешевге таянуу менен билдирди.
Прокуратуранын маалыматына ылайык, саат 10.36да Астананын аэропортуна Кызылорда — Астана каттамы боюнча учкан Bek Air авиакомпаниясынын Fokker 100 үлгүсүндөгү учагы авариялык түрдө келип конгон. Анын дөңгөлөгү толук ачылбай калган. Анын ичинде 121 киши болгон. Алардын 116сы жүргүнчү, бешөө экипаж. Жабыркагандар жана жаракат алгандар болгон эмес.
"Азыр эле аэропорттон келдим. Кудайга шүгүр эч ким жабыркаган жок. Акыркы жүргүнчүлөр учактын ичине калтырган буюмдарын алып кетишти. Атайын комиссия иликтөө иштерин баштады. Экипаждын чебердигин жана жердеги бардык кызматтын мыкты иштегендигин баса белгилегим келет. Экипажды мамлекеттик сыйлыкка көрсөтөбүз", — деп Исекешев өзүнүн Facebook социалдык тармагындагы баракчасына жазды.
Учак эмне себептен авариялык түрдө конууга мажбур болгонун Казакстандын инвестиция жана өнүгүү министрлигинин атайын комиссиясы да тергейт.
