БИШКЕК, 22-мар. — Sputnik. Жамааттык коопсуздук уюмунун туруктуу кеңеши кыргыз-өзбек чек арасындагы маселе боюнча шашылыш жыйынды эртең да уланта турганын Кыргызстандын Тышкы иштер министрлиги билдирди.
Маалыматка ылайык, жыйын кыргыз тараптын демилгеси менен чогулган. Бүгүн башталган жолугушууда Кыргызстандын ЖККУдагы туруктуу жана ыйгарымдуу өкүлү Аман Мамбетсеитов Аксы районунун кыргыз-өзбек такталбаган мамлекеттик чек арасындагы түзүлгөн кырдаал боюнча маалымат берди.
ЖККУнун туруктуу өкүлдөрү кыргыз-өзбек чек арасындагы түзүлгөн курч кырдаалга тынчсыздануусун билдирип, абалга мындан ары да байкоо жүргүзө тургандыктарын белгилешти.
2016-жылдын 18-мартында өзбек тарап Жалал-Абад облусунун Ала-Бука районундагы Кыргызстан менен болгон чек арасына зооттолгон эки транспортту, 40ка чукул аскерин койгон. Бир жактуу негизде "Маданият" көзөмөл өткөрүү пунктун жапкан. Өзбекстандын Улуттук коопсуздук кызматынын Чек ара комитети Нооруз майрамына көрүлгөн даярдыктан улам, чек араларын бир тараптуу бекемдегенин билдирген.
Тышкы иштер министрлиги Өзбекстанга чек арадагы блок-постторду алуу боюнча нота жөнөткөн.
Учурда блок-посттор алына элек, бирок, Тараптардын сүйлөшүүлөрүнөн улам Чаласарт аймагын көзөмөлдөп турган эки өлкө аскерлери кыскарып, сегизден гана аскер калган.
