БИШКЕК, 22-мар. — Sputnik. Жалал-Абад облусунун Аксы районундагы кыргыз-өзбек чек арасында турган кыргыз жоокерлерине "Жалал-Абад жаштар коому" атайын жардам бергенин коомдун жетекчиси Ороз Абдуллаев Sputnik Кыргызстан маалымат агенттигине билдирди.
Белгилей кетсек, 18-мартта Өзбекстандын чек арачылары Жалал-Абад облусундагы кыргыз-өзбек чек арасына БТР жана аскерлерин жайгаштырган болчу.
Абдуллаевдин айтымында, алардын коому чек арада турган кыргыз аскерлеринин маанайын көтөрүү үчүн аз да болсо шириндиктерди алып келишкен.
"Биздин коомдун сегиз өкүлү чек арада турган жоокерлер үчүн деп аз да болсо тамак-аш алып келдик. Кыргызстандын бүтүндүгү ар бирибиз үчүн маанилүү. Жоокерлердин маанайы көтөрүлүп калды", — деди ал.
Кыргыз-өзбек чек арасындагы абалды жолго салуу үчүн Кыргызстандын өкмөтү аракеттерди көрүүдө. Бул маселе ЖККУнун атайын жыйынында да талкууланат.
