БИШКЕК, 22-мар. — Sputnik. Үстүбүздөгү жылдын 18-мартында Бишкектин төрөт үйлөрүнүн биринде 15 жаштагы окуучу кыз эркек бала төрөгөнүн Sputnik Кыргызстан агенттигине ИИМ өкүлү Эрнис Осмонбаев билдирди.
Анын айтымында, учурда бул иш боюнча иликтөө жүрүп жатат. Алдын ала маалымат боюнча кыз сүйлөшүп жүргөн жигитинен кош бойлуу болгон. Божомолдорго ылайык, баланын атасы Кыргызстандын аймагынан чыгып кеткен.
"Өспүрүм кыз баланын атасына эч кандай дооматы жок экенин билдирди. Жалал-Абадда көп балалуу үй-бүлөдө тарбияланган. Жергиликтүү дарыгерлер кызды төрөт учурундагы кыйынчылыктардан кооптонуп, Бишкекке жиберишкен", — деди Осмонбаев.
ИИМдин маалыматы боюнча жаш эне менен ымыркайдын абалы жакшы, бүгүн алар төрөт үйүнөн чыгарылды.
Расмий статистика боюнча Кыргызстанда жыл сайын 13 жаштан 17 жашка чейин төрт-беш өспүрүм көз жарат.
