БИШКЕК, 24-фев. — Sputnik. Премьер-министр Темир Сариев Кыргызстандын улуттук курама командаларын даярдоо борборунун эскиздик долбоору менен таанышты.
Өкмөттүн маалымат кызматынын билдирүүсүнө ылайык, өкмөт башчы тийиштүү мамлекеттик ведомство жетекчилери менен кеңешме өткөрүп, алдыдагы милдеттердин катарына спорттук базаларды куруу, машыктыруучулар курамынын маселесин чечүү, спорттук резервди даярдоо, массалык спортту жана сергек жашоо образын жайылтуу болуп саналарын белгиледи.
"Спортту биздин миллиондогон жарандарыбыз, өзгөчө, жаштар тандоосу үчүн тийиштүү шарттар түзүлүүсү керек. Учурда өсүп келе жаткан муун өкүлдөрүндө спорттук оюндарга карата кызыгуусу жогорулап бара жаткандыгы байкалууда", — деп белгиледи Сариев.
Өкмөт башчынын айтымында, тилекке каршы, спортчулардын таймаштарга даярдык көрүүсү үчүн спорттук комплекстердин абалын жана жабдуусун жакшыртуу маселеси актуалдуу бойдон калууда. Учурда ири жана заманбап спорттук объектилердин жетишсиздиги курч турат.
Долбоорго ылайык, улуттук даярдоо борборунун аймагында трибунасы менен футболдук талаа, медициналык борбор, кичи футболдук аянттар, спорттун ар кыл түрү боюнча машыгуу залдары иш алып бармакчы.
Буга байланыштуу Футбол федерациясы жана Жаштар иштери, дене тарбия жана спорт боюнча мамлекеттик агенттиги өкмөттөн аталган борборду куруу үчүн жер бөлүү тууралуу маселени карап чыгуусун өтүнөт.
