БИШКЕК, 24-фев. — Sputnik. Ош облусундагы Чоң-Алай районунун Дароот-Коргон айылында 27 жаштагы жергиликтүү тургундун унаасынан 12 килограммга чукул нашаа табылганын облустук ИИБ билдирди.
Маалыматка ылайык, баңгизат "Mercedes-Benz" үлгүсүндөгү унаадан алынган. Милиция кызматкерлери белгисинен кийин айдоочу бир нече метрге чейин узап барып токтоп, сары түстөгү пакетти кардын астына жашырып жаткан жеринен кармалган. Андан соң унааны тинтүү учурунда машинанын шамал тоскучунун алдынан бир капка салынган жети даана төрт бурчтуу 9,2 килограммдык зат табылган.
Химиялык экспертиза табылган 11,8 килограмм заттын нашаа экени аныктап чыкты.
Аталган факт боюнча кылмыш иши козголуп, тергөө амалдары жүрүп жатат. Ал эми кылмышка шектүү адам учурда убактылуу кармоочу жайга киргизилди.
