БИШКЕК, 24-фев. — Sputnik. Япониянын премьер-министри Синдзо Абэ Россияга расмий эмес иш сапары менен келет. Бул тууралуу япон өкмөтүнүн башкы катчысы Ёсихидэ Суга маалымат жыйында билдирди.
Япониянын Киодо маалымат агенттиги өз булактарына таянуу менен АКШнын президенти Барак Обама 9-февралда Синдзо Абэ менен телефон аркылуу сүйлөшкөндө май айында Россияга болчу иш-сапарына ашыкпай турууну өтүнгөн.
Маалымат агенттиктин билдиришинче, Обама япон премьерине "азыр ыңгайлуу учур эмес" деп айткан. Бирок, Абэ өзүнүн көз карашын өзгөртпөй турганын баса белгилеген.
"Биз Японияга болчу сапарга чейин (Россия президентинин – Ред.) премьер-министр Абэ тийиштүү мөөнөттө Россияга расмий эмес сапар менен келүүсү боюнча маселени макулдашып жатабыз", — дейт башкы катчы.
АКШ Россия менен Япониянын ортосундагы тыгыз байланыштын болушуна тынчсызданып келет. Абэ аймактык маселелер боюнча сүйлөшүүлөрдө ийгиликке жетерин жана Россия менен тынчтык келишимин түзүүгө жетишерин күтөт. Ошол эле учурда бул сапар америка-япон алакаларында олку-солку абал жаратышы мүмкүн деп жазат Киодо маалымат агенттиги.
Алдын ала маалыматтар боюнча япон премьери 6-майда расмий эмес иш-сапары менен келет. Эки өлкө башчынын жолугушуусу Сочи шаарында өтүшү мүмкүн.
