БИШКЕК, 13-фев. — Sputnik. Кыргызстанда аскер кызматкерлеринин бир күндүк тамак-ашына 60 сом бөлүнөрө акыйкатчы Кубат Оторбаевдин Коргоо иштери боюнча мамлекеттик комитеттин төрагасы Марат Кенжесариев менен жолугушуусу учурунда белгилүү болду.
Акыйкатчы институтунун маалыматына ылайык, Оторбаев аталган мекеменин жетекчиси менен кечээ жолугуп, аскердик кызмат өтөп жаткан жоокерлердин ал-абалын талкуулады.
Акыйкатчы Кенжесариевди мониторингдин жыйынтыгы менен тааныштырды. Ага ылайык, аскер бөлүктөрүндө бир катар кемчиликтер аныкталган.
"Аскер кызматкерлеринин бир күндүк тамагына 60 сом бөлүнөт экен. Ал эми жаза өтөп жаткандардын азык-түлүгүнө 86 сом каралат. Бул акчанын жетишсиз экени айгине", — деди акыйкатчы.
Кенжесариевдин айтымында, учурда прапорщик менен офицерлер үчүн Бишкек, Ош жана Баткен аймактарында турак жай курулуп жатканын, бүгүнкү күндө 3331 адам үй алуу үчүн кезекте турганын белгиледи.
Жолугушуунун соңунда эки тарап мекемелер ортосундагы кызматташуунун күчөтүү зарылдыгына токтолушту.
