БИШКЕК, 13-фев. — Sputnik. Быйыл ички дүң продуктунун ɵсүү деңгээли 5,2%ды түзүшү керек. Бул тууралуу премьер-министр Темир Сариев өкмɵттүн 2015-жылдын социалдык-экономикалык ɵнүгүү жыйынтыгы каралган жыйынында билдирди.
Анда финансы министри Арзыбек Кожошев 2015-жылдын жыйынтыгы боюнча экономикалык ɵсүү 103,5 пайызды түзүп, ички дүң продуктунун кɵлɵмү 423,6 миллиард сом суммасында эсептелгендигин маалымдады.
Анын айтымында, инфляциянын орточо жылдык кɵрсɵткүчү 2014-жылга карата 106,5 пайызды түзгөн.
"Эл аралык резервдердин кɵлɵмү жыл соңуна карата 1778,3 миллион долларды түзүп, жалпы жонунан 179,3 миллион долларга кыскарган", — деди ал.
Жыйында премьер-министр бизнеске жагымдуу шарттарды түзүү боюнча ишти күчтɵндүрүү зарылдыгын билдирди.
"Быйыл биздин алдыбызда ИДП ɵсүү деңгээлин 5,2 пайызга жеткирүү милдети турат. Экономикалык кыйынчылыктарды эске алуу менен аталган кɵрсɵткүчкɵ жетишүү татаал болот. Бирок ага карабастан, биз коюлган милдетти аткаруубуз зарыл. Ал үчүн бардык мамлекеттик орган жетекчилери жаңы ɵндүрүштү ишке киргизүү жана жаңы иш орундарды түзүү жаатында бизнес менен тыгыз иштешүүсү керек", — деди ал.
Кыргызстандын 2015-жылдагы социалдык-экономикалык ɵнүгүү жыйынтыгына баа берүүдɵ Сариев мамлекеттик орган жетекчилеринин ишмердүүлүгүн баалоонун негизги критерийи катары калктын ишеним деңгээли болуп саналарын айтты.
"Жыл жыйынтыгы боюнча өкмөткө болгон ишеним былтыркыга салыштырмалуу 7 пайызга ɵсүп, 22 пайызды түзгɵн. Бул абдан жакшы кɵрсɵткүч. Муну менен катар бир катар министрлик жана ведомстволор бул жаатта начар кɵрсɵткүчтɵргɵ ээ. Ал эми бизге Жалал-Абад облусу үлгү болуп бере алат, жыл жыйынтыгы боюнча, жарандарды сурамжылоонун натыйжасында облус калктын ишеним кɵрсɵтүү деңгээли боюнча биринчи орунга чыккан", — деди өкмөт башчы.
Өкмɵттүн Кыргызстандын 2015-жыл үчүн социалдык-экономикалык ɵнүгүү жыйынтыктары жɵнүндɵгү буйрук долбоору сунуш-пикирлерди эске алуу менен жактырылды.
