БИШКЕК, 10-фев. — Sputnik. Москвада өрттөн каза болгондордун сөөгүн таануу процедурасы аяктаганын өкмөттүн маалымат кызматы билдирди.
Эскерте кетсек, үстүбүздөгү жылдын 30-январында Москва шаарынын чыгыш аймагындагы Стромынка көчөсүндөгү өнөр жай имараттарынын биринен өрт чыгып, 3 миң чарчы метри күйүп кеткен. Натыйжада имараттын чатыры кулап, 12 адам каза тапкан. Анын сегизи Кыргызстандын жараны, экөө — Россиянын жарандыгын алган кыргыздар жана өзбекстандык эки жаран экендиги белгилүү болгон.
Буга чейин каза болгондордун сөөгүн таануу үчүн бир ай керектелери айтылган. Эки тараптуу сүйлөшүүлөрдүн натыйжасында россиялык эксперттер аталган процедураны 10 күнгө жеткирбей бүтүрүп беришти. Маалыматка ылайык, учурда Россиянын Тергөө комитетинин башкармалыгы тийиштүү корутунду чыгарып берген.
Ал эми сөөктөрдү Кыргызстанга алып келүүгө кыргыз өкмөтү 700 миң сом бөлдү.
Сөөктөр туугандарынын коштоосунда авиаунаа менен алгач Ош шаарына, андан кийин туулган жери Баткен облусуна алып келинери белгилүү болду.
