БИШКЕК, 8-фев. — Sputnik. Москвадагы тигүү цехинде каза болгон Кыргызстандын жарандарынын жакындарына Россиядагы мекендештер активдүү жардам берип жатканын Москвада иштеп жүргөн Алмаз Зайналов Sputnik Кыргызстан маалымат агенттигине билдирди.
Зайналов Москва шаарында иштеп жүргөн мекендештер маркумдун жакындарына колунан келген жардамын берип жатканын баса белгиледи.
"200, 500 1000 сомдон алып келип жардам бергендер бар. Ушинтип чогулуп отуруп, азыр 15 миң сомдой болду. Арасынан айрым мекендештер "түштөрүм жаман болуп жатат, маркум мекендештердин жакындарына жардам берейинчи" деп келип өз жардамын берип кетип жатышат", — дейт ал.
Зайналов анализдер чыккандан кийин сегиз кыргызстандык жаран мекенине жөнөтүлөрүн айтып, Россиянын жарандыгын алган эки кыргызстандыктын маселеси кандай болот деп кабатырланып жатканын кошумчалады.
Москва шаарында көп жылдардан бери иштеп жүргөн Жылдыз Осмонова да өрттөн каза күйөөсү менен баласын жоготкон жаранга жардам берүү боюнча аракеттер жүрүп жатканын айтты.
"Баласы менен жолдошунан айрылган Аидага акча жана жаңы төрөлгөн баласына кийим-кечек чогултуп жатабыз. Буюрса бул жардамды 10-февралда барып тапшырабыз. Мындай окуя башыбыздан өткөн деп кийим-кечек менен жардам берип жаткандардын көпчүлүгү жесир аялдар болууда", — дейт Осмонова.
Ал ошондой эле, Аидага жардам чогултуу учурунда жолдошу каза болуп, балдарын өздөрү багып жаткан жесир аялдар көп экени байкалганын кошумчалады.
Ошондой эле, Москва шаарындагы кыргыз диаспораларынын өкүлдөрү да маркумдардын жакындарына материалык жардам берип, окуя болгон жерге барып куран түшүрүштү.
