БИШКЕК, 2-фев. — Sputnik. "Кумтөрдө" каза тапкан кызматкер боюнча иликтөө иштин жыйынтыгы соттук медициналык экспертизанын жыйынтыгына көз каранды. Буга ылайык болжолдуу кошумча дагы 23 күн керектелет. Бул тууралуу түзүлгөн комиссиянын төрагасы Чынара Татыгулова Sputnik Кыргызстанга билдирди.
Эске салсак, 25-январда "Кумтөр" кенинде кокустуктун айынан бир жумушчу каза болуп, артында жубайы менен 10 баласы калган.
"Иликтөө иштерин жүргүзүүгө комиссияга 15 күн берилген. Буга ылайык сегизинчи февралда жыйынтыктар чыгарылышы керек. Бирок, комиссиянын тыянагы соттук медициналык экспертизанын жыйынтыгына байланыштуу болгондуктан, 24-25-февралга чейин созулуп кетиши ыктымал", — деп билдирет Татыгулова.
Тагыраагы, эгер маркум кырсыкка 50 пайыз күнөөлүү деп табылса, компенсация суммасы 50 пайызга кыскарат.
Бирок, "Кумтөр" тарабынан социалдык фондго бөлүнүүчү каражаттан сырткары эмгек кодекси боюнча маркумдун үй-бүлөсүнө 20 жылдык маянасы төлөнөөрү тууралуу комиссия төрагасы кошумчалады.
Белгилей кетсек, компенсациялык төлөмдөр иликтөө иштери өз жыйынтыгын бергенден кийин гана ишке ашырылат.
