БИШКЕК, 28-янв. — Sputnik. Жалал-Абад облусунун Токтогул районунда ажатканадан куткаруучулар алып чыккан ымыркай учурда райондук аймактык ооруканада. Баланы таштады деп шектелип жаткан энеси ооруканага өзүнчө жайгаштырылды жана бул иш боюнча кылмыш иши козголду. Бул туурасында Токтогул райондук ИИБден кабарлашты.
"Ымыркайды ажатканага таштаган деп шектелип жаткан 23 жаштагы Айпери аттуу аял Токтогул районунун Сары-Сөгөт айылында туулган жана ажатканага жакын жайгашкан №54 үйдө жашаган. Учурда дарыгерлердин көзөмөлүнөн өтүү зарылдыгын айтышып, аны ооруканага жаткырышты. ", — деп билдиришти ИИБден.
Милициядан баланы сактап калуу үчүн бийиктиги 2-2,5 метрге чукул даараткананы бузуп алып чыгышкандыгын маалымдашты.
"Баланы алып чыкканда денеси муздап калыптыр, бирок ал ыйлап чыкты. "Тез жардамга" тирүү тапшырылды. Азыр абалы канааттандырарлык деп врачтар айтып жатат. Ымыркай айына жетип төрөлгөн экен", — деп билдиришти алар.
Учурда Кылмыш жаза кодексинин 97-беренеси (адам өлтүрүүгө аракет жасоо) боюнча кылмыш иши козголуп, тергөө иштери башталган.
