БИШКЕК, 27-янв. — Sputnik. Тоңдун Бар-Булак айылында сууга чөгүп бара жаткан кыздын сактап калган Таалайбек Тункушевди Өзгөчө кырдаал министрлиги мекеменин медалы менен сыйлады. Бул тууралуу аталган министрлик билдирди.
Маалыматка ылайык, былтыркы жылдын 8-августунда Тункушев үй-бүлөсү менен эс алып жүргөн. Анын айтымында, ошол күнү аба-ырайы начарлап, катуу шамал болуп жаткан.
"Жаңы эле сууга бутумду салып жатсам бир аял чуркап келип, көлдө бир кыздын чөгүп бара жатканын айтты. Кыздын элесин араң эле көрдүм — ал бирде көрүнүп, бирде жок болуп кетип жатты. Жанында эч ким жок экен, баары суудан чыгып кетишиптир. Толкунга карабай сууга кирдим. Жакшы сүзгөндүктөн эч кандай коркуу сезими болгон жок", — дейт куткаруучу.
Тункушев кызды суудан алып чыккан. Ал Кыргыз мамлекеттик унаа, байланыш жана архитектура университетинин студенти болуп чыкты.
Тункушев CLICK AIRWAYS авиакомпаниясына таандык ИЛ-76 учагынын бортинженери болуп эмгектенет.
Өз сөзүндө куткаруучу сууга түшүү эрежелерин бекем сактоо керектигин, сүзгөндү билбегендер жээктен алыс кетпеши керектигин эскертти.
