БИШКЕК, 26-янв. — Sputnik. Каттоодон өтө элек уюлдук байланыш абоненттери беш күндөн кийин өчүрүлө турганын Мамлекеттик байланыш агенттиги билдирди.
Маалыматка ылайык, жуманын аягына чейин абоненттер өз номерин каттап, уюлдук байланыш операторлору менен келишим түзүүгө убактысы бар.
"2016-жылдын 18-январына карата республика боюнча 7 миллион 814 миң 743 көчмө байланыш абоненти бар болсо, алардын 7,5 миллиону персонификациялоодон өткөн. Бул абоненттердин жалпы санынын 95,85 пайызын түзөт", — деп айтылат билдирүүдө.
Байланыш агенттиги SIM-карталарды каттоо акысыз жүргүзүлө турганын эскертет. Келишим түзүү үчүн уюлдук компаниянын каалаган тейлөө борборуна жарандын өздүгүн тастыктаган документ (паспорт, пенсиялык күбөлүгү, аскердик билет) жетиштүү болот. 16 жашка толо элек жарандардын телефон номери ата-энесине жана жакындарына катталат. Чет элдик жарандар кыргызстандыктар каттоодон өткөн шарттар боюнча каттоо процедурасынан өтүшөт.
Байланыш агенттиги өзүнө катталган SIM-картаны чоочун адамдарга берип же сатууга тыюу салынарын белгилейт. Себеби келишим түзгөндөн кийин абонент катталган номерден жиберилген чакырыктар үчүн жоопкерчиликти өзүнө алат.
SIM-карталарды персонификациялоо мөөнөтү мындан ары узартылбайт.
2016-жылдын 1-февралынан тартып уюлдук байланыштын каттоодон өтпөгөн абоненттери өчүрүлөт.
