БИШКЕК, 26-янв. — Sputnik. Баткенде былтыр 11 миң 416 гектар жер иштетилбей калган. Бул тууралуу премьер-министр Темир Сариев аталган облуска болгон иш сапарынын маалында билдирди.
Бүгүн өкмөт башчы иш сапарынын алкагында Көкташ — Ак-Сай —Тамдык, Миңбулак —Чорго — Аксай, Аксай — Тамдык жолунун курулушунун жүрүшү менен таанышты.
Көкташ — Ак-Сай — Тамдык жолунун узундугу 24 чакырымды түзөт, 2014-2015-жылдары аталган жолдун 13 чакырымы бүткөрүлгөн. Учурда курулуш иштери толугу менен жүрүп жатат.
Сариев чек арага жакын жайгашкан жер аянттарын иштетүү зарылдыгына токтолду. Ал өткөн жылы Баткен облусунун аймагында 11 миң 416 гектар жер иштетилбей калганын, анын ичинен 856 гектары – сугат жер экенин айтып, мындай көрүнүшкө жол берилбестен, жер аянттарын тегиз иштетүү зарылдыгын белгиледи.
