БИШКЕК, 25-янв. — Sputnik. Ички иштер министрлиги белгилүү спортчу Руслан Түмөнбаев милиция кызматкерлери тарабынан кармалган учурда мас экенин тастыктаган медициналык документтин копиясын таратты.
Олимпиада оюндарынын коло байгесин жеңип алган 29 жаштагы спортчу 21-январга караган түнү милиция тарабынан кармалган. Укук коргоо органдарынын айтымында, Түмөнбаев "Lexus RX 330" унаасын эч кандай документи жок айдап келе жатканда токтотулган. Унаа айып короого токтотулгандан кийин спортчу травматикалык тапанча менен жол инспекторлорун опузалаганы, ошол маалда анын мас экенин экспертиза аныктаганы айтылат. Мындан соң Түмөнбаевге карата кылмыш иши козголуп, ал камакка алынган.
Соттун чечими менен спортчу Бишкектин чегинен чыкпоо боюнча тил каттын негизинде бошотулган. Эртеси Түмөнбаев билдирүү таратып, анда кармоо учурунда соо болгонун, инспекторлорду коркутуп-үркүтпөгөнүн, милициянын айткандары менен окуянын басымдуу бөлүгү чындыкка дал келбей турганын маалымдаган.
Буга байланыштуу ИИМ медициналык күбөлөндүрүүнүн протоколунун копиясын таратты. Анын жыйынтыгы боюнча Түмөнбаев кармоо учурунда мас экени тастыкталган.
