БИШКЕК, 20-янв. – Sputnik. Италиялык медик окумуштуу Серджио Канаверо денеге башты жамоо мүмкүн экенин РИА Новостиге айтып берди.
"Буга чейин денеге башты жамаштыруу мүмкүн экени айтылганда, бизди катуу сындагандар чыккан. Бирок, биз тажрыйбаны далилдеп сындагандарга татыктуу жооп бергенибизге абдан кубанып жатам. Учурда илимий эки журналга башты денеге жамаштыруу техникасын айтып берген макаланы жарыяладык", — деп билдирет Канаверо.
Медицина боюнча илимпоздун айтымында, мындай илимий тажрыйбалар Кытайда да активдүү жүргүзүлүп келет. Андагы хирургдар тобунун лидери Жень Сяотиндин билдирүүсүндө башты жаңы денеге жамаштыруудан кийин мээнин иштөөсү калыбына келген.
Мындай тажрыйба жүргүзүүгө Вьетнам дагы кызыга баштады.
"Биздин кесиптештер жүлүн менен баштын кан тамырларынын түтүктөрүн бириктирүү мүмкүн эмес экендигин билдиришкен. Мындан улам башы алмаштырылган жандык кыймылсыз абалга келээрин айтышкан. Бирок, биздин Кытай менен Түштүк Кореяда жүргүзгөн тажрыйбаларыбыз башка жыйынтык бере алды", — деп кошумчалайт дарыгер.
Натыйжада, клеткаларды камдаштыра турган атайын синетикалык полимердин жардамы менен нерв клеткалары жармаштырылып, чычкандарга жүргүзүлгөн тажрыйба ийгиликтүү аяктаган.
Тажрыйба жандыктын башын жартылай жана толук алып салуу менен кайра жамаштыруу түрүндө жүргүзүлгөн.
