БИШКЕК, 19-янв. — Sputnik. Бишкекте Жол кайгуул кызматынын дагы бир инспекторун коюп кетишкенин Sputnik Кыргызстан агенттигине аталган кызматтан билдиришти.
Кырсык 18-январь күнү болгон. Маалыматка ылайык, инспектор Киев көчөсү менен бара жаткан "Митсубиси Спейс стар" үлгүсүндөгү унааны токтотууга аракет кылган.
"Инспекторду кызмат өтөп жаткан учурда сүзүп кетишкен. Милициянын старшинасынын колу сынып, гипсте. Ага амбулатордук дарылануу дайындалды", — деп айтылат билдирүүдө.
Инспекторду сүзүп кеткен айдоочуга карата Кылмыш жаза кодексинин 232-беренесинин ("Бейбашчылык") негизинде кылмыш иши козголду. Экспертизанын жыйынтыгы боюнча анын соо экени аныкталды.
Бул акыркы аптада жол инспекторлору жабыр тарткан экинчи учур. Буга чейин 22 жаштагы жаран ЖКК кызматкерин сүзүп кеткен. Экспертиза анын мас абалында унаа айдап жүргөнүн аныктаган.
