БИШКЕК, 10-янв. — Sputnik. Кечээ Жалал-Абад облусунун Аксы районундагы Сары-Көпүрө аймагынын такталбаган тилкесинде өзбек чек арачылары менен кыргыз жарандарынын ортосунда чыр чыгып кеткен. Аны кесепетинен, өзбек чек арачылары курал колдонуп, кыргызстандык жаран бутуна ок жеген. Бул туурасында КРдин Мамлекеттик чек ара кызматынын маалымат кызматынан билдиришти.
Алдын ала маалыматтарда, Кыргызстандын төрт жараны эки мамлекеттин чек арасын бойлой кеткен суу түтүгүн чыгарып жатканда, өзбек чек арачылары келип, ишти токтотууну талап кылышкан. Түтүк коңшу өлкө тарабынан да пайдаланылып турган.
"Ал жерден эки тарап чатакташа кетип, өзбек чек арачылары курал колдонуп, анын кесепетинен кыргыз жараны жаракат алган",— деп билдирди КРдин Чек ара кызматынын маалымат кызматынан.
Ал эми бул чатак туурасында жазган Sputnik Өзбекстандын кабарында, бир нече киши өзбек тараптан металл түтүктөрдү алып чыгууга аракет кылган.
"Кезметте турган өзбек чек арачыларга алар баш ийбей, мамлекеттик чек араны бузуп өтүп бараткандарга эскертүү иретинде асманга ок атылган. Андан кийин гана чек арачылар курал колдонгонго аргасыз болгон",— деп жазды Sputnik Өзбекстан.
Ушул эле күнү Жалал-Абад облусу боюнча чек ара кызматынын жана Янги-Курган багытындагы чек ара аймагынын өкүлдөрү жолугуп, чатакты иликтөө боюнча биргелешкен иштерди жүргүзүүнү чечишти.
КРдин Чек ара кызматынын маалымат кызматы учурда жарадар болгон жаранды Кыргызстанга алып келүү боюнча сүйлөшүүлөрдү жүргүзүп жаткандыгын билдирди.
