БИШКЕК, 10-янв. — Sputnik. Жибек-Жолу проспектисинде эки кишини коюп кеткен автоунаанын айдоочусун али карамала элек. Бул туурасында Бишкек шаардык Ички иштер башкы башкармалыгынын Жол кайгуул кызматынан билдиришти.
Аталган кызматтын маалыматында, 9-январдын кечинде саат 20.30дар чамасында белгисиз автоунаа 40 жаштагы аял менен 46 жаштагы эркек кишини коюп кеткен. Кырсык болгон жерден аял киши дароо жан берген, ал эми экинчисин Бишкек шаарындагы №4 шаардык ооруканага жеткирилген. Ал башынан жаракат алып, учурда кайра жандандыруу бөлүмүндө жатат.
Жол кайгуул кызматынын инспекторлору айдоочунун ким экендигин таап чыгышкан. Маалымат кызматынан кишини коюп кеткен жыйырма эки жаштагы В.А. аттуу жаран автоунааны атасынан сурабай айдап кеткендигин билдиришти.
"Тойота-Харриер" автоунаасы кырсыктан кийин Бишкек шаарындагы Чыгыш автобекетинин аймагындагы Осмонкул көчөсүндөгү үйгө токтоулуп коюлган.
Маалымат кызматынан учурда кишини коюп кеткен 22 жаштагы жарандын чет өлкөгө чыгып кетүүсүнүн алдын алуу жана издөө иштери жүрүп жаткандыгын билдиришти.
