БИШКЕК, 10-янв. — Sputnik. Кытайдын Ehang компаниясы Лас-Вегаста өткөн CES көргөзмөсүндө жүргүнчү ташыган квадрокоптерди көпчүлүктүн назарына сунуштады. Бул тууралуу РИА Новости Guardian басылмасына таянуу менен билдирди.
Гуанчжоудогу компаниянын маалыматына ылайык, Ehang 184 квадрокоптери салмагы 100 килограммга чейинки бир кишини ташый алат жана ал жерден 300-500 метр бийиктикте уча алат. Аппараттын төрт бурчунда жайгашкан винт бар, ал саатына 100 чакырым ылдамдыкта уча алат. Квадрокоптер эң максималдуу 3,5 бийиктикте учса, 23 мүнөт учуу үчүн ал 2 сааттык зарадды коротот.
Компаниядан билдиришкендей, аппарат керектүү болгон бардык сыноолордон өттү. Анын ичинде киши ташуу боюнча аракеттер да ийгиликтүү аяктаган. Эми аны каттоо гана калды. Жүргүнчүлөр үчүн учууга атайын лицензия талап кылынбайт.
Ehang компаниясынын негиздөөчүлөрүнүн бири Шань Сяо квадрокоптер сатыкка быйыл чыгарын, анын баасы 200-300 миң доллардын тегерегинде экенин кошумчалады.
