БИШКЕК, 8-янв. – Sputnik. "Ислам мамлекети" террордук тобунун мүчөсү, согушкер өз энесин казганактаган элдин алдында өлүм жазасына "тартып", жанын алды. Бул туурасында Сириядагы адамдардын укугу боюнча байкоочу кеңештен билдиришти.
Укук коргоочулардын айтымында, болжол менен 45 жаштардагы аял жыйырма жаштагы уулун "Ислам мамлекети " деп атап алган топтон чыгып, Раккадан биргеликте качып кеткенге көндүрүүгө аракет кылган. Маркум аял муну коалициялык күчтөр "топтун бардык согушкерлерин өлтүрөт" деп, баласынын өмүрү үчүн кооптонгондуктан улам жасаган. Баласы муну террордук топтун жетекчисине жеткирип барып, аялды алар дароо кармашкан.
Бечара аялды өзү иштеген почтанын жанында казганактаган элдин алдында өлтүргөнгө баласынын колу барган.
Декабрь айындагы маалыматтарга караганда, 2014-жылы Ирактын түндүгүндөгү Мосул шаарын алып жатканда "Ислам мамлекетинин" согушкерлери 837 аялды өлүм жазасына тарткан. Андан сырткаркы үрөй учурган окуялардын бири Пальмира шаарында болгон. "Ислам мамлекетинин" согушкерлери Сириянын Хомс провинциясында жөн жай жашаган 400 адамдын өмүрүн алган.
