БИШКЕК, 5-янв. – Sputnik. Премьер-министр Темир Сариев электр энергиясын сарамжалдуу пайдалануу максатында коомдук жайларды, анын ичинде, кафе, ресторан, сауна жана ири ишканаларды акылдуу эсептегичке өткөрүүнү тапшырды.
Бул иштер электр энергиясына аяр мамиле кылып, үнөмдөп пайдалануу максатында жасалмакчы.
"Учурда эсептегичтин эң кымбаты 150 АКШ доллары турат. Андыктан, бардык бизнес тармактарынын акылдуу эсептегичке өтүүгө мүмкүнчүлүгү бар", — деди Сариев.
Ал жыл өткөн сайын өлкөдө электр энергиясына болгон суроо-талап өсүп жаткандыгын, андыктан бул тармакты 40 пайызга чейин көтөрүү 2020-жылга чейинки кыргыз өкмөтүнүн негизги пландарынын бири экендигин билдирди.
