БИШКЕК, 4-янв. – Sputnik. Чучукту Facebook тармагындагы баракчасында жылкынын жыныс органына теңеген Майкл Макфиттин ата-энеси маалымат каражаттарында билдирүү таратты.
"Кумтөр" компаниясында иштеген кызматкердин ата-энеси Жон менен Мэрилин Майклдын оюнда кири жок экенин айтышууда.
"Уулубуз ашпозчу даярдаган тамактардын баарын жактырчу. Жергиликтүү ашкананын тамактарын куштарлануу менен айтып берчү. Майкл бул жергиликтүү чүйгүн тамак экенин айткан", — деди 63 жаштагы фермер Жон Макфит.
Алар жаралган түшүнбөстүктөр дипломаттардын кийлигишүүсү менен чечилерине ишеним артышууда.
Социалдык тармактарда бир топ ызы-чуу жараткан постун өчүрүп, Макфит кечирим суроого аргасыз болгон. Аны укук коргоо кызматкерлери "Манас" эл аралык аба майданынан кармашкан.
Бул боюнча кылмыш жаза кодексинин "Улуттук, расалык жана диний кастыкты козутканы үчүн" беренеси боюнча кылмыш ишин козгоо маселесин УКМК карап жатканы айтылган. Учурда Макфит Каракол шаарында экени белгилүү болду.
