БИШКЕК, 16-дек. — Sputnik. Ош облусунун Кара-Суу районунда жарандарга акысыз юридикалык жардам берүү борбору ачылганын Юстиция министрлиги билдирди.
Маалыматка ылайык, борбор райондун мамлекеттик нотариалдык мекемесинин имаратында жайгашкан. Ачылуу салтанатына катышып жаткан министрликтин өкүлдөрү борбордо жогорку квалификациялуу адистер өз графиги менен иштей турганын белгилешти.
Иш-чарада мындай борборлор жалпы республика боюнча 2010-жылдан баштап иштей баштаганы, өткөн жылдын эсеби менен аталган борборлорго 50 миңден ашуун жаран кайрылганы айтылды.
Салтанаттан кийин министрликтин өкүлдөрү Кара-Кулжа, Алай жана Ноокат райондорун кыдырып, жергиликтүү элге юридикалык жардам берүү борборлорунун иштөө ыкмаларын түшүндүрүп беришти.
