Мамлекет башчысы Кыргызстанда стабилдүүлүк орноп, ири инвестициялар келип баштагандыгына, өлкө инвесторлордун армиясын күтүп жаткандыгына токтолду.
"Кыргызстан мөңгүлөрдүн жана чоң-чоң дарыялардын башталган жеринде турат. Ал дарыяларга ГЭС салса болот. Кыргызстанды Орто Азиянын жүрөгү деп айтсак болот. Инвестерлор келип баштады. Дагы да келет. Албетте, араб бир туугандар келип кетсе, абдан ыраазы болот элек", — деди Атамбаев.
Президент Кыргызстандын ЕАЭБге мүчөлүгү Кыргызстан менен Кувейттин ортосунда реалдуу кызматташууга өбөлгө болорун айтты. Ал дегеле, бул өлкө инвесторлор үчүн өтө ыңгайлуу баштапкы аянтча боло ала турган жер экендигин белгиледи.
"Анткени Кыргызстандын бир тарабында 1,5 миллиард адамы бар Кытай, экинчи тарабында Бажы биримдиги турат. Бизде жасалган товардын бардыгы 200 миллиондук калктуу рынокко эч кандай тоскоолдуксуз кире алат", — деп белгиледи Атамбаев.
Атамбаевдин Кувейтке болгон расмий иш сапары учурунда Кувейт мамлекетинин Эмири Шейх Сабах Аль-Ахмад Аль-Жабер Аль-Сабах менен жолугуп, кызматташуу боюнча өкмөттөр аралык бир нече документтерге кол коюлду.
