БИШКЕК, 8-дек. — Sputnik. Тарыхый окуяларга басым жасоо менен мааракелик иш-чараларды өткөрүү маселесин кайра карап чыгуу зарылдыгын вице-премьер Гүлмира Кудайбердиева мамлекеттик орган жетекчилеринин жыйынында билдирди.
Аталган министрлик тарабынан сунушталган 75 иш-чаранын ичинен вице-премьер өкмөттүн кароосуна Кыргызстандын эгемендигинин 25 жылдыгы, Жусуп Баласагындын 1000 жылдыгы жана Үркүндүн 100 жылдыгы сыяктуу жалпы улуттук мүнөздөгү иш-чараларды гана жөнөтүүнү сунуштады.
"Эксперттердин айтымында, кыргызстандыктар той-ашка жыл сайын миллиарддаган акчаларды сарптайт. Насыя алып той бергендер бар. Бул каражат ошол эле үй-бүлөнүн муктаждыгын жапканга толук жетмек. Массалык тойлорду иретке келтирүүнү ойлонуш керек. Орто айлык алган мамлекеттик кызматкер чачылып той берген учурларды кездештирип келебиз. Мындан улам премьер-министр Темир Сариев коомчулукка жүк болгон массалык той-аштарды өткөрүүнү жөнгө салуучу чараларды көрүүнү тапшырды", — деди Кудайбердиева.
Вице-премьер учурдагы мамлекеттик кызмат тууралуу мыйзамга кошумчаларды киргизүүнү демилгеледи.
