БИШКЕК, 3-дек. — Sputnik. Улуу жазуучу Чыңгыз Айтматовдун чыгармачылыгына байланыштуу "Айтматов окуулары – 2015" аттуу эл аралык илимий-практикалык конференция өтөт. Бул тууралуу КР Улуттук илимдер академиясынын маалымат кызматы билдирди.
Илимий жыйында Чыңгыз Айтматовдун чыгармачылык феномени: тексттер жана контексттер, "Жусуп Баласагындын доору, түрк элдеринин көөнөргүс тарыхый-этнографиялык мурастары жана Ч.Айтматов", "Доордун философиялык, этикалык жана социалдык проблемалары Ч.Айтматовдун чыгармаларында", "Айтматовдун чыгармачылыгы искусстводо: экранда, сахнада, сүрөт өнөрүндө" аттуу темалар алдында талкууга алынат.
Улуу жазуучу 1928-жылы Талас облусунун Шекер айылында туулган. Анын чыгармалары дүйнөнүн көптөгөн тилдерине которулган. Жазуучу 2008-жылдын 10-июнунда 80 жашында каза болгон.
