БИШКЕК, 16-ноя. — Sputnik. Бишкектин Дөлөн Өмүрзаков атындагы стадионунда өтө турган Кыргызстан — Иордания беттешүүсү учурундагы коомдук тартипке милициянын үч миң кызматкери көз сала турганын Бишкек ШИИБ билдирди.
Маалыматка ылайык, стадиондун ичи-тышын текшерүү үчүн ИИМдин кинология кызматы тартылат. Ар бир участок, сектор жана көзөмөл пункттарына жетекчи бекитилип, коопсуздукту камсыздоо боюнча жумушчу топтору түзүлгөн.
Мындан тышкары, Бишкек шаарынын борбордук бөлүгүндө жол кыймылына чек коюлат. Стадионго кире бериште күйөрмандар дыкат текшерүүдөн өтөт.
Милиция кызматкерлери стадионго жарылуучу заттарды алып кирүүгө болбой турганын, оюн талаасына жана башка аракеттерге тыюу салынарын эскертип, эреже бузуулар футболдук клубдарга да, жөнөкөй күйөрмандарга да терс таасир тийгизерин белгилейт.
