БИШКЕК, 13-ноя. — Sputnik. Кыргызстандык режиссер Таалайбек Кулмендеевдин "Мунабия" кинодолбоору Эстониянын борбору Таллин шаарында өтө турган XIX Эл аралык "Темные ночи" кинофестивалына даярдалып жаткан тасма катары катышарын Кинематографты өнүктүрүү фонду билдирди.
Маалыматка ылайык, фестиваль бүгүн, 13-ноябрда башталып бир жумага созулат. 16-20-ноябрь күндөрү ири иш-чаранын алкагында быйыл биринчи жолу аягына чыга элек, бирок иштелип жаткан тасмалардын сынагы өтмөкчү. Кыргызстандык фильм дал ушул номинацияда 25 тасма менен ат салышмакчы.
Кыргыз Эл жазуучусу Казат Акматовдун "Мунабия" новелласынын негизинде жасалып жаткан долбоор коомчулуктун жектөөсүнөн, кордоосунан башын бийик көтөрүп, бардык кыйынчылыктарды жеңе билген даанышман кыргыз аялынын образы чагылдырылган.
