БИШКЕК, 9-ноя. — Sputnik. Кыргызстандык режиссер Мирлан Абдыкалыковдун "Сүтак" тасмасы Котбуста (Германия) өткөн эл аралык кинофестивалда "Тасманын Германиядагы прокатына жардам берүү" ("Поддержка проката фильма в Германии") байгесин жеңип алды. Бул тууралуу тасманын продюсерлеринин бири Алтынай Койчуманова билдирди.
Койчуманованын айтымында, Германиядан алган байге жана 10 миң евро кыргыз тасмасынын Германияда көрсөтүлүүсүнө укук берет.
"Кийинки жылы жаздан тарта "Сүтак" тасмасы Германиянын кинотеатрларында көрсөтүлүп баштайт. Ошондой эле, DVDге да чыгып Германиянын телеканалдарына да сунушталат", — дейт Койчуманова.
Адамдардын ортосундагы таза мамилелер, аруу сезимдер, ыйык каада-салт тууралуу тартылган тасма "Мыкты чет элдик фильм" номинациясы боюнча "Оскар" сыйлыгынын узун тизмесине кирген.
