БИШКЕК, 12-ноя. — Sputnik. Дүйнө чемпионатынын тандоо турунун алкагында Австралия менен Кыргызстандын курама командаларынын беттешүүсү бүгүн Канберра шаарында өтөт.
Оюн Бишкек убактысы боюнча саат 15.00дө 25 миң 11 адамды батырган GIO Stadium аренасында болору күтүлүүдө.
Аталган командалар буга чейин Бишкекте жолугушкан. Анда атаандаштар 1:2 эсеби менен жергиликтүү футболчуларды утуп алышкан.
Кыргызстандык команданы стадиондон 100дөн ашуун күйөрман колдойт.
Беш оюндун жыйынтыгы менен Иордания 13 упай менен ишенимдүү түрдө биринчи орунда келе жатат. Экинчи орунда тогуз упай менен австралиялыктар келе жатат, анын запаста дагы бир оюну бар. Кыргызстан сегиз упай менен үчүнчү орунда. Төртүнчү орунду эки упай менен Тажикстандын командасы камсыздаса, болгону бир упай менен Бангладеш акыркы орунда.
