БИШКЕК, 4-ноя. — Sputnik. Улуттук курама команданын чет жерде ойногон төрт футболчусу машыгуу үчүн Бишкекке келгенин Футбол федерациясы билдирди.
Команда учурда 12-ноябрь күнү Австралия жана 17-ноябрь күнү Иордания менен боло турган мелдешке даярдык көрүп жатат. Кыргызстандык футболчулар Канберра шаарына 7-ноябрь күнү жөнөп кетет.
Үч күндүн ичинде командага түркиялык "Туранспордо" ойногон жарым чабуулчу Илдар Амиров, Литванын "Гранитас" клубундагы коргоочу Тамирлан Козубаев кошулду. Ал эми бүгүн тажикстандык "Худжант" клубунда ойногон дарбазачы Валерий Кашуба менен тайланддык "Prachuap" клубунун жарым коргоочусу Эдгар Бернхардт келди.
Машыгуулар бир күндө эки жолу өтүүдө. Жалпысынан Кыргызстандын жогорку лигасы жана легионерлер болуп 23 футболист тартылды. Чет жердеги башка оюнчулар тууралуу маалымат жок.
