БИШКЕК, 10-окт. — Sputnik. Эл аралык Космос станциясында жүргүзүлгөн эксперименттин жыйынтыгына ылайык, космоско чыгууда кандын курамы өзгөрө турганы аныкталганын казакстандык космонавт-сыноочу Айдын Аимбетов маалымат жыйында билдирди.
"Казакстандын ири илимий программасы ишке ашты. Россиялык кесиптештердин жардамы менен кандын биохимиялык курамына изилдөө жасалды. Алынган жыйынтыктарга таяна турган болсок, космоско чыкканда кандын курамы чындап эле өзгөрө турганы аныкталды", — деди ал.
Россиялык космонавт-рекордсмен Геннадий Падалканын айтымында, ага Роскосмос өнөктөштөрү менен тең ата катышкан эксперименттер көбүрөк жаккан.
"Бул эң биринчиден суюктуктун айлануусу боюнча өнөктөштөр жүргүзгөн эксперимент. Анда Россиянын жабдуулары колдонулду. Анткени акыркы учурларда космонавт менен астронавттардын көрүүсү баш мээдеги басымдан улам начарлаганы белгилүү", — деди Падалка.
Эксперимент учурунда көздүн басымын аныктай турган эндоскоп жана томографтар менен ультра үндүү изилдөө жүргүзүлгөн.
