БИШКЕК, 7-окт. — Sputnik. Бишкектин жаңы конуштарынын биринде мас болуп агасын сабап өлтүргөн 30 жаштагы жаран кармалганын шаардык ИИБ билдирди.
Маалыматка ылайык, 30-сентябрь күнү аталган жаран борбор калаанын Калыс-Ордо жаңы конушунда жашаган агасыныкына келип, экөө арак ичишкен. Сөздөн сөз чыгып отуруп, ал мушташка айланып кеткен. Натыйжада ур-токмокко алыныган үй ээси эсин жоготкон абалда ооруканага түшкөн.
Текшерүү учурунда анын мээсине доо кетип, баш сөөктөрү сынганы аныкталган. Алган жаракаттарынан улам 33 жаштагы Жалал-Абаддын Токтогул районунун тургуну эсине келбей каза болгон.
Бул факт боюнча кылмыш иши козголуп, ага шектүү катары өлгөн адамдын иниси кармалган.
Учурда Биринчи Май райондук соттун чечими менен ал тергөө камагына алынды. Иликтөө иштери жүрүп жатат.
