БИШКЕК, 7-окт. — Sputnik. Салык кызматына маалыматтарды онлайн функциясы менен бериле турган контролдук-кассалык машиналарды (ККМ) фискалдаштыруу боюнча пилоттук долбоор ишке киргизилгенин Мамлекеттик салык кызматы билдирди.
Маалыматка ылайык, долбоор август айынан тартып Бишкек шаарынын жана Чүй облусунун аймагында өткөрүлүүдө.
Салык кызматынын төрагасы Замир Осмоновдун айтымында, долбоорду ишке ашыруу мамлекетке гана эмес, ошондой эле абийирдүү салык төлөөчүлөргө да олуттуу пайда келтирет.
"Акча жүгүртүүлөрдү легалдаштыруунун эсебинен салык жыйымдары көбөйөт, айкын фискалдык система түзүлүп, салык төлөөчүлөр үчүн атаандаштык чөйрөсү түзүлөт. Ошондой эле абийирдүү субъекттерге карата көзөмөлдүн ар кандай формалары (рейддик, хронометраждык) кыскартылат", — деди төрага.
"ККМ онлайн режими" долбооруна ыктыярдуу негизде ишкердиктин 35 субъектиси –супермаркеттер, май куюучу жайлар, дарыкана, медициналык лабораториялар, диагностикалык борборлор, ТТСтер, кафелер, дүкөндөр жана мейманканалар катышууда.
35 субъектинин 46 контролдук-кассалык машиналары орнотулду, бардыгы болуп 43 миң 996 чек урулду. Долбоорду фискалдаштырууда жүргүзүлүп жаткан эсеп жөнүндө маалымат атайын кассалык аппаратты колдонуу менен оперативдүү түрдө берилет.
