Каргашалуу окуя жергиликтүү убакыт боюнча саат 9.00дө зыяратчылардын эки ири агымы шайтанды ташка алуу жөрөлгөсүн аткаруу үчүн эки көчөнүн кошулушундагы анча чоң эмес аянтта чогулганынан келип чыккан. Улам кийинки келгени алдындагы адамдарды түртө беришкен. Зыяратчылар жыгылып, аба жетпей эстери ооп, тепсендиде калышкан.
"Бул жүрөктүн үшүн алган көрүнүш болду — бут алдыбызда тепсендиде калып өлгөн адамдардын сөөгү, алардын үстүнө артындагылардын түрткөнүнөн жыгылган кишилер… Паника башталып кетти", — дейт Мина өрөөнүндөгү кырсыкка күбө болгондор соцтармактардан.
Кырсык жергиликтүү бийлик тарабынан бекитилген графиктин сакталбаганынан улам келип чыккан. Сауд Аравия бийлиги зыяратчыларга аталган жөрөлгөнү жасоо үчүн ар бир топтун убактысы жазылган график таратат.
"Трагедия африкалык зыяратчылардын белгиленген убакыттан эрте чыгып алганынан улам болду", — дешти күбөлөр.
Ажылык — ар бир мусулмандын өмүрүндө жок дегенде бир жолу аткара турган парзы. 2014-жылы дүйнөнүн булуң-бурчунан келген зыяратчылардын саны эки миллиондон ашкан.
