БИШКЕК, 22-сен. — Sputnik. Россия Кыргызстандын ЕАЭБге толук кандуу мүчө болуу жолунда ар кыл жардам көрсөтүп келе жатканын Экономика министри Олег Панкратов Бишкекте өтүп жаткан кыргыз-россиялык аймак аралык конференцияда билдирди.
Анын айтымында, Россиянын финансылык колдоосу менен бажы көзөмөл пункттары жана лабораториялары тийиштүү жабдык менен камсыз болду.
"ЕАЭБге кошулуу менен Кыргызстан дүйнө рыногунун кызыкчылыгын жаратып, атаандаштыкка жөндөмдүү боло баштады. Бул республикага инвестициянын келиши үчүн жаңы мүмкүнчүлүктөрдү ачат. Анын бири катары уставдык капиталы бир миллиард долларды түзгөн Россия-Кыргыз фондун айтууга болот. Фонд ишкерлерге насыя берүүнү баштады", — деди министр.
Панкратов бул конференция эки мамлекеттин аймактары үчүн экономикалык байланыштарды жана ишкерлердин арасында келишимдерди түзүү аянтчасы болуп каларын кошумчалады.
"Биз унаа, энергетика, айыл чарба тармагындагы соода байланыштарды жеңилдетүүнүн жолдорун талкуулайбыз", — деди чиновник.
Кыргызстан Евразиялык экономикалык биримдикке 12-августтан тарта мүчө болгон. Мындан улам кыргыз-казак чек арасындагы бардык бажы процедуралары алынып, Кыргызстандын аймагында бирдиктүү бажы тарифи жана ЕАЭБ ишмердүүлүгүнүн тышкы экономикалык бирдиктүү товар номенклатурасы киргизилген.
ЕАЭБ — Россия, Казакстан жана Белоруссиянын Бажы биримдигинин негизинде 2015-жылдын 1-январынан тарта түзүлгөн экономикалык биримдик. Ага Армения да мүчө болгон. Биримдиктин алкагында ага мүчө мамлекеттер арасында товар, кызмат, капитал жана эмгек ресурстарынын эркин жүрүүсү каралган.
