БИШКЕК, 19-сен. — Sputnik. Каракол шаарында тоо-кен өнөр жайына тийиштүү көйгөйлөрдү талкуулаган IV Эл аралык конференция өтүп жатат. Бул туурасында КРдин Илимдер академиясынын маалымат кызматы билдирди.
Конференцияда тоо-кен өнөр жайы жаатындагы, экология, айлана-чөйрөнү коргоо, көп түрдүүлүктү сактоо, эколого-геохимиялык, биогеохимиялык жана биологиялык изилдөөнүн методологиясы боюнча маселелер каралууда.
Маалымат кызматы кен казылып жаткан аймактарды баалоо жана калыбына келтирүү көйгөйлөрү талкууланарын билдирди.
Илимий конференцияга Кыргызстандан сырткары, Казакстан, Тажикстан, Россия жана Түркия өлкөлөрүнөн келген окумуштуулар чакырылган. Андан сырткары, жергиликтүү экологиялык бейөкмөт уюмдар, "Ысык-Көл" биосфералык аймактын кызматкерлери, жергиликтүү бийлик органдары катышууда.
