БИШКЕК, 11-сен. — Sputnik. Өкмөттүн жыйынында премьер-министр Темир Сариев 4-октябрда шайлоо жаңы технологияны колдонуу менен өтө турганын эске салып, аны ачык-айкын өткөрүү негизги милдет экенин баса белгиледи. Бул тууралуу өкмөттүн маалымат кызматы билдирди.
Парламенттик шайлоо 2015-жылдын 4-октябрына белгиленген. Ага 14 саясый партия ат салышууда. Шайлоочулардын жети пайыздан көп добушун алган партиялар парламентке өтөт.
Сариев биометрикалык маалымат топтоону киргизүүнүн негизги принциби – "бир шайлоочу – бир добуш" экенин белгиледи.
"Бул шайлоодо саясий партиялар мыйзамдарды сакташы керек. Шайлоо жыйынтыгы чыгарылган соң жетиштүү добуш албай калгандар элди көчөгө алып чыгып, ар кыл мыйзамсыз аракеттерге барабыз, чыр чыгарам деген ойлорунан азыртан тарта кайтышы керек. Бизге мамлекет керек, мамлекеттин келечеги керек", – деди Темир Сариев.
4-сентябрдан тарта үгүт иштери башталды. БШК саясий партиялар үчүн эфирдик убакыттарды да бөлүштүргөн.
