БИШКЕК, 3-сен. — Sputnik. Жол кайгуул кызматынын жетекчиси Сергей Дьяченко инспекторлордун жеке унаасын кызматтык унаа катары жабдуу тууралуу ИИМдин буйругун түшүндүрүп берди.
Буйрукка ылайык, Жол кайгуул кызматкерлерине жеке унаасын кызматтык машинага катары пайдаланууга укук берилет. Мындай унаа кызмат өтөөдө гана пайдаланылышы шарт. Мындай чечим кызматтык унаалардын жетишсиздигинен улам кабыл алынган.
Жол кайгуул кызматынын жетекчиси келишим инспектордун каалоосу менен түзүлө турганын кошумчалады. Бардык керектүү каражатты аталган кызмат бөлүп берет.
Дьяченконун айтымында, унаага чаптамаларды жабыштыруу жана тийиштүү жабдык алууга 30 миң сомдон ашуун каражат талап кылынат. Буйрукка ылайык, инспектор машинасына атайы жарык берүүчү жана үн чыгаруучу белгилерди коюшу керек. Мындай жабдуу менен жабдылган жеке унааны Жол кайгуул кызматкерлери кызмат учурунда гана пайдалана алат.
"Унааларды жумуштан башка убакта пайдаланууга тыюу салынат. Эгер кызматкере жумуштан кете турган болсо, келишим жокко чыгарылат", — дейт Дьяченко.
Кызмат учурунда пайдаланууга берилген жеке унаа үчүн компенсация берүү боюнча токтом чыккан. Ага ылайык, 100 чакырым жүргөн унаага атайы каражат бөлүнөт.
Эгер унаа бийик тоолуу аймактарга чыкса, компенсациянын көлөмү 10 пайызга жогорулайт.
Токтомдо унаалардын түрү жана ага ылайык төлөнүүчү каражаттын суммасы түшүрүлгөн таблица бар. Эгер инспектордун унаасы таблицада жок болсо, ал үчүн машинанын классы, техникалык өзгөчөлүгү боюнча акча берилет.
Дьяченко учурда жеке унаасын кызматтык унаага айлантууну каалаган 15 ыктыярчы даяр экенин белгиледи.
