БИШКЕК, 25-авг. — Sputnik. Милициянын майору Жеңиш Жумашов кызматынан бошотулуп тим болбостон, наамы да төмөндөтүлгөнүн маалымат жыйынында ИИМ министринин биринчи орун басары Нурбай Касымбаев билдирди.
Интернет булактарына жол кайгуул кызматынын инспекторлору башка милиция кызматкеринин баласы айдап бара жаткан машинаны токтоткону үчүн уят сөздөр менен сөгүшкөн видеосу тараган. Видео каармандардын баары кызматынан алынды. Премьер-министр Темир Сариев ИИМ жетекчилигин чакырып, милиционер кызматынан да кетип, наамынан да төмөндөтүлүшү керектигин билдирген. Ошол эле күнү ИИМ министри Мелис Турганбаев Жол кайгуул кызматынын бөлүм жетекчилеринин жыйынын өткөргөн.
"Бардыгы болуп 14 адам дисциплинардык жазага тартылды, майор кызматынан бошотулуп, наамы да төмөндөдү. Министр экинчи ирет мындай терс иштер кайталанбастыгын эскертти", — деди Касымбаев.
Ички иштер министрлиги Ош жана Бишкек шаарларынын Жол кайгуул кызматтарынын жетекчилерине сөгүш жарыяланганын белгилейт.
ИИМ Жол кайгуул кызматынын жетекчиси Сергей Дьяченко мындай чара башка инспекторлор үчүн сабак болушу керектигин белгиледи. Анын айтымында, экинчи мындай нерсе кайталанбашы үчүн окуяга байланыштуу катуу чаралар көрүлүшү керек.
