БИШКЕК, 23-авг. — Sputnik. Премьер-министр Темир Сариев 24-августта ички иштер министри Мелис Турганбаев жана Жол кайгуул кызматынын башчысы Сергей Дьяченкону кабыл алып, интернетке тараган Ош шаардык Ички иштер башкармалыгынын жол кайгуул кызматкерлери катышкан окуя боюнча жыйын курду.
Жыйында премьер-министр жол кайгуул кызматкерлери катышкан тасма коомдук резонанс жаратканын билдирип, кызматкерлердин мындай жүрүш-турушу бүтүндөй Ички иштер системасынын кадыр-баркына доо кетиргенин илдирди.
"Элдин милицияга болгон ишенимин кайтаруу боюнча бардык аракет көрүлүп жатса, формачан адамдардын мындай жүрүш-турушу Ички иштер системасынын кадыр-баркын түшүрдү. Ошондуктан, тыкыр кызматтык иликтөөнүн жыйынтыгы менен тасмадагы фактылар аныкталса, аталган кызматкерди кызматтан алуу эле жетишсиз. Аны бардык наамдарынан ажыратып, мындай абалга жол берген жетекчилер жазаланышы керек", — деди Сариев.
Премьер-министр өлкөдөгү бардык ички иштер бөлүмдөрүндө офицердик жыйындарды өткөрүүнү ички иштер министрине тапшырды.
Премьер-министр бул окуядан бардык укук коргоо кызматкерлери тиешелүү жыйынтык чыгарып, сабак алышы керектигин кошумчалады.
